Björgunarsveitir í Árnessýslu hafa verið kallaðar út vegna vélsleðaslyss við Klukkutinda. Björgunarsveitir munu flytja sjúkraflutningamenn á slysstað og hefur þyrla Landhelgisgæslunnar verið kölluð út.
Þetta kemur fram í tilkynningu frá Landsbjörgu. Fréttin verður uppfærð.
Uppfært kl. 21.10:
Að sögn upplýsinga- og kynningarfulltrúa Landsbjargar er þyrla Landhelgisgæslunnar rétt ókomin á vettvang. Um er að ræða einn slasaðan vélsleðamann, en frekari upplýsingar liggja ekki fyrir að svo stöddu.
Uppfært kl. 22.01:
Þyrla Landhelgisgæslunnar hefur sótt manninn og komið honum undir læknishendur í Reykjavík. Búið er að kalla til baka björgunarsveitir sem höfðu lagt af stað á vettvang akandi. Upplýsingar um meiðsl mannsins liggja ekki fyrir að svo stöddu.