Þrír menn sem ákærðir voru fyrir sérstaklega hættulega líkamsárás, hótanir og frelsissviptingu fengu allir þunga dóma í héraðsdómi. En dómarnir eru allir skilorðsbundnir vegna þess hversu langt er um liðið og að þeir hafa allir snúið af þeirri braut er þeir voru á og tekið upp aðra hætti.
Þremenningarnir voru ákærðir fyrir hafa ráðist á karlmann á barnum Monte Carlo í Reykjavík 19. desember 2010 vegna meintrar skuldar og farið síðan með hann í íbúð við Suðurhlíð þar sem líkamsmeiðingarnar hafi haldið áfram. Manninnum hafi verið haldið föngnum í íbúðinni, meðal annars kefluðum í baðkari yfir nótt þar til faðir hans greiddi mönnunum eina milljón króna í lausnargjald.
Sá sem fékk þyngsta dóminn, Ríkharð Júlíus Ríkharðsson, sæti fangelsi í 2 ár og 6 mánuði. Davíð Fjeldsted fékk tveggja ára dóm og sá þriðji, Magnús Sigurjón Einarsson fékk eins árs fangelsisdóm.
Í niðurstöðu Héraðsdóms Reykjavíkur kemur fram að fresta skal fullnustu refsinga þeirra og skulu refsingar Ríkharðs og Davíðs, falla niður að liðnum 3 árum haldi þeir almennt skilorð en refsing Magnúsar skal falla niður að liðnum 2 árum haldi hann sama skilorð.
Hótuðu að nauðga manninum og systur hans ef hann myndi kjafta frá
Í dómi héraðsdóms kemur fram að mennirnir séu sakfelldir fyrir að hafa ráðist á manninn og veitt honum áverka. Einnig voru þeir sakfelldir fyrir að hafa svipt hann frelsi sínu og hóta honum og fjölskyldu hans hans. Þeir Ríkharð og Davíð voru sakfelldir fyrir að hafa brotið gegn manninum á Monte Carlo en allir þrír fyrir að hafa brotið gegn honum í íbúðinni.
Samkvæmt ákæru héldu þremenningarnir áfram í sameiningu, þegar í íbúðina var komið, að krefja hann um peninga og veitast að honum og slá hann ítrekað í höfuð og líkama, með hnefum, hnúajárnum og kylfu. Þeir helltu þvottaefni upp í munn mannsins, brenndu hann með sígarettum og hótuðu honum að klippa af honum fingur og eyru.
Meðan á þessu stóð afklæddu þremenningarnir fórnarlambið. Héldu honum fjötruðum og kefluðum yfir nótt í baðkeri í íbúðinni og var hann látinn laus síðdegis föstudaginn 20. desember eftir að faðir hans hafði, að beiðni mannsins, greitt 1 milljón króna inn á bankareikning Magnúsar til að leysa soninn úr haldi í samræmi við kröfur þeirra.
Áður en maðurinn var látinn laus hótuðu þeir honum því að ef hann kærði brotin til lögreglu yrði honum og fjölskyldu hans gert mein þar á meðal að systir hans yrði barin og henni og honum sjálfum nauðgað. Af líkamsmeiðingum þessum hlaut maðurinn mar á öxl og upphandlegg, yfirborðsáverka á bakvegg brjóstkassa, brunaáverka á höfði og hálsi, þrjú hringlaga brunasár á aftanverðum hálsi, marga yfirborðsáverka á hálsi, mar á olnboga og yfirborðsáverka á öðrum hlutum höfuðs og mar á hægra auga.
Tveir þeirra dæmdir fyrir svipuð brot árið 2011
Í dómi héraðsdóms er farið yfir sakaferil þremenninganna. Ríkharð var dæmdur í 2 ára fangelsi 2009 fyrir brennu, skjalafals og fleiri brot. Árið 2011 var hann sektaður fyrir akstur undir áhrifum fíkniefna og sama ár dæmdur í 3 ára og 6 mánaða fangelsi fyrir líkamsárás og frelsissviptingu, í svokölluðu Black Pistons máli. Honum var veitt reynslulausn í 2 ár 5. febrúar 2014 á eftirstöðvum refsingar, 500 dögum.
Davíð var dæmdur í 3 ára fangelsi 2011 fyrir aðild að sama máli Honum var veitt reynslulausn í 2 ár 1. maí 2013 á eftirstöðvum refsingar, 360 dögum.
Davíð játaði fyrir dómi í því máli að hafa ráðist að fórnarlambinu, ungum karlmanni með höggum og spörkum. Játning hans var þó fjarri ákærulýsingu. Þar var honum ásamt Ríkharð Júlíusi Ríkharðssynigefið að sök að hafa haldið ungum karlmanni, fæddum 1989, frá kvöldi þriðjudags 11. maí sl. fram að hádegi daginn eftir. Á þeim tíma gengið í skrokk á manninum, notað til þess vopn á borð við þykkar rafmagnssnúrur, belti, slíðrað skrautsverð og hníf auk þess að kýla og sparka.
Magnús var dæmdur í 4 mánaða fangelsi 2011 fyrir fíkniefnalagabrot. Eftir það hefur hann fimm sinnum verið sektaður fyrir umferðar- og fíkniefnalagabrot.
Hafa allir snúið af þeirri braut sem þeir voru á
„Ákærðu frömdu brotið í desember 2010. Það var fyrst kært 3 árum síðar og ákæra gefin út 4 árum eftir að þeir gerðust brotlegir. Ákærðu hafa nú allir snúið af þeirri braut er þeir voru á og tekið upp aðra hætti. Ákærðu, Davíð og Magnús, eru í fastri vinnu og ákærði Ríkharð býr erlendis og stundar nám. Með hliðsjón af gerbreyttum háttum ákærðu og þegar litið er til þess hversu langur tími er liðinn frá brotinu verða refsingar ákærðu bundnar skilorði eins og í dómsorði segir,“ segir í dómi Héraðsdóms Reykjavíkur frá því á föstudag.