Beita sér fyrir tveggja milljarða hækkun á samkeppnissjóðum

Sigmundur Davíð Gunnlaugsson, forsætisráðherra, gerði í dag grein fyrir stefnu og aðgerðaráætlun Vísinda- og tækniráðs á þingi í dag í svari við fyrirspurn Valgerðar Bjarnadóttur. Segir Sigmundur að breytingar séu að verða á málaflokknum í kjölfar aukins framlags ríkissjóðs.

Ríkissjóður samþykkti á síðasta ári 2,8 milljarða aukafjárfestingu til vísinda og nýsköpunar. Er hækkun um 800 milljónir í samkeppnissjóði komin til framkvæmda og á næsta ári mun ríkisstjórnin beita sér fyrir tveggja milljarða hækkun til viðbótar, í samræmi við aðgerðaáætlun ráðsins.

Hluti áætlunarinnar snýr að fjármögnun doktorsnáms. Er það markmið ráðsins að árið 2016 verði 200 námsnemastöður að fullu fjármagnaðar úr innlendum samkeppnissjóðum árlega.

Úthlutun á þessu ári fjármagnar aukalega að fullu 41 stöðu doktorsnema til þriggja ára. Segir í svari ráðherrans að því ætti fátt að koma í veg fyrir að markmiðið um 200 doktorsnemastöður náist á næsta ári.

Vísinda- og tækniráð gefur út stöðuskýrslu þar sem fram kemur hvernig eftirfylgni áætlunarinnar er. Segir Sigmundur að það komi til greina að gefa Alþingi reglulega skýrslu um stöðu aðgerðaáætlunarinnar.

• Blogga um frétt