Blakdeild Þróttar, Neskaupstað, hefur fest kaup á þremur uppblásnum íþróttahúsum. Þorbjörg Ólöf Jónsdóttir, formaður blakdeildarinnar, segir að húsin hafi verið keypt þar sem ekki hafi verið nógu margir keppnisvellir í Neskaupstað til þess að hægt hefði verið að halda öldungamótið í blaki en um 970 keppendur taka þátt í mótinu í ár með 133 liðum og hefst mótið á fimmtudaginn kemur.
Húsin þrjú kostuðu í heildina um 10 milljónir króna komin hingað til lands og segir Þorbjörg að ekki sé búið að ákveða hvað gert verði við húsin þrjú að móti loknu. Samvinnufélag útgerðarmanna í Neskaupstað styrki blakdeildina um tvær og hálfa milljón króna til kaupanna og Fjarðabyggð um 750 þúsund krónur.