Skuldir hættar að hamla einkaneyslu

Svo hefur dregið úr skuldabyrði heimila að hjá þorra landsmanna hamlar greiðslubyrði lána ekki lengur vexti einkaneyslu og fjárfestingu.

Þetta segir Ingólfur Bender, forstöðumaður Greiningar Íslandsbanka, og bendir á að skuldahlutföll fyrirtækja og heimila þegar á heildina er litið séu orðin lík því sem þau voru fyrir hrun, þótt enn séu til hópar sem eru í verri stöðu en áður. Skuldakreppan sé því að mestu að baki hvað þetta varðar, þótt áhrifa hennar, á borð við meira langtímaatvinnuleysi en fyrir hrun, gæti enn.

Í fréttaskýringu um þetta efni í Morgunblaðinu í dag telur Ingólfur bætta skuldastöðu heimila munu örva einkaneyslu og tekur sem dæmi að Greining Íslandsbanka spái 3,8% vexti í einkaneyslu í ár og 2,8% vexti 2016. Þá spái hún 15,4% vexti í fjárfestingu heimila í húsnæði í ár og 11,9% vexti í þeirri fjárfestingu á næsta ári.