Vetrarveður og ófærð í Norður-Þingeyjarsýslu

Veturinn hefur aftur tekið völdin með kulda og snjókomu þótt sumar sé nýgengið í garð. Vetrarfærð er víða á landinu, eins og læknirinn í N-Þingeyjarsýslu varð áþreifanlega var við á leið sinni til Þórshafnar í gærmorgun.

Ófært var þá um Hófaskarðið, sem er um 40 km vestan við Þórshöfn og er slæmur farartálmi á nýja veginum yfir Hólaheiðina en skarðið lokast á augabragði í hríðarveðrum.

Símasamband er afar lélegt á þessu svæði, hvorki er tetra- né gsm-samband nema á hæsta punkti í skarðinu. Læknirinn lagði því land undir fót og gekk upp skarðið til að ná símasambandi, nokkuð góður göngutúr. Hann beið síðan um eina klukkustund eftir snjóblásara og komst svo til Þórshafnar.