Talið er mögulegt að sinueldar sem brunnu á 10-12 hektara svæði við Stokkseyri í gærkvöldi, hafi kviknað er fugl flaug á háspennulínu. „Það þarf bara einn neista, ekki meira,“ segir Halldór Ásgeirsson, varðstjóri hjá Brunavörnum Árnessýslu í í samtali við mbl.is.
Frétt mbl.is: Mikill sinubruni við Stokkseyri
Eldurinn kviknaði á áttunda tímanum í gærkvöldi. Svæðið er erfitt yfirferðar, votlendi og mói, svo ekki var hægt að koma neinum bílum eða öðrum tækjum á svæðið. Um 20 slökkviliðsmenn frá Brunavörnum Árnessýslu gengu því um svæðið og börðu niður eldinn. Búið var að slökkva í síðustu glæðunum um kl. 1 í nótt. Starfsmaður Brunavarna flaug yfir svæðið í gær og gat leiðbeint slökkviliðsmönnum á jörðu niðri þegar reykurinn varð svo þéttur að vart sást út úr augum.
„Það er alveg ofboðslegur þurrkur,“ segir Halldór. Engin mannvirki hafi verið í hættu vegna eldsins. Hins vegar hafi fólk orðið fyrir óþægindum vegna reyks sem lagði yfir hluta Stokkseyrar.
Halldór segir að ekki hafi þurft að vakta svæðið í nótt. „Það er verið að giska á að það hafi verið fugl sem flaug á háspennulínu,“ segir Halldór spurður um upptök eldsins. „Það þarf bara einn neista, það þarf ekki meira.“