Sérsveit ríkislögreglustjóra var kölluð út á sjötta tímanum vegna karlmanns sem hafði í hótunum við fólk á heimili í Garðabæ. Sérsveitarmenn hafa náð að yfirbuga manninn sem var handtekinn. Engan sakaði.
Samkvæmt upplýsingum frá lögreglunni á höfuðborgarsvæðinu var maðurinn, sem er á þrítugsaldri, í annarlegu ástandi. Hann hefur áður komið við sögu lögreglu.
Maðurinn hótaði jafnframt lögreglumönnum sem komu á vettvang, en hann sagðist vera með eggvopn. Maðurinn veitti hins vegar engan mótþróa með vopni þegar sérsveitin yfirbugaði hann.
Maður gistir nú fangaklefa og verður yfirheyrður þegar ástand hans lagast.