Vinna við hreinsun gatna og gönguleiða gengur hægar en undanfarin ár vegna mikils magns af sandi á stéttum og stígum sem dreift var til hálkuvarna í vetur. Starfsmenn verktaka hafa því orðið að vinna lengri vinnudaga en áætlað var, að því er segir á vef Reykjavíkurborgar.
Forsópun (fyrri umferð) tefst í Hliðunum, Lauganeshverfi og Bökkunum og Hólunum í Breiðholti frá því sem fyrstu áætlanir gerðu ráð fyrir. Í miðborginni gekk einnig hægar þar sem bílum var lagt jafnóðum í stæði þó búið væri að setja upp skilti við götur.
Þrátt fyrir þessar tafir seinkar verkinu ekki í heild. Hreinsun gatna og stíga í borginni á að vera lokið fyrir 13. júní.