Skaftafell og Þingvellir fá stærstu fjárframlögin í nýsamþykkri áætlun ríkisstjórnarinnar til uppbyggingar á ferðamannastöðum hér á landi, en 850 milljónir munu fara í verkefnið. Aðrir staðir sem fá háar upphæðir eru meðal annars Geysir, Gullfoss, Dimmuborgir og Dynjandi. Helstu verkefni sem tilgreind eru í áætluninni eru skipulag á svæðum, viðhald á göngustígum, uppbygging útsýnispalla og merkingar. Þá á að setja upp salernisaðstöðu á nokkrum stöðum og stækka bílastæði. Mbl.is skoðaði nánar í hvaða verkefni og á hvaða staði framlögin fara.

Löngu tímabært viðhald á Seljavallalaug

Meðal þeirra verkefna sem verja á fjármunum í í þetta skiptið er Seljavallalaug. Laugin hefur undanfarin ár mátt þola mikinn ágang, en verja á fimm milljónum í að steypa gólf í búningsklefum og allsherjar steypuviðgerðir.

Undanfarin ár hefur aðstaðan í klefunum tveimur verið með þeim hætti að fæstir notast við búningsklefana heldur skipta um föt utandyra. Slíkt eykur auðvitað upplifun viðkomandi og bætir tengingu hans við náttúruna, en á rigningardögum getur verið leiðinlegt að geyma fötin utandyra.

Önnur minni verkefni fela meðal annars í sér að verja á 10 milljónum til viðhalds og merkingar á göngustígum í Þórsmörk, 16,2 milljónir fara í byggingu hreinsivirkis og salernishúss við Hverfjall. Þá á að koma upp aðkomuskilti og útsýnispalli við Kattarauga og setja upp fimm fræðsluskilti við Mývatn og Laxá. Endurhlaða á fiskibyrgin við Gufuskála og setja setja upp aðkomuskilti á Fjallabaki og fara í umfangsmiklar útbætur á stígum kringum Laugaveginn.

Skaftafell stærsta verkefnið

Stærsta einstaka verkefnið er Skaftafell, en þangað er 160 milljónum varið. 40 milljónir fara í framkvæmd á bílastæði, 35 milljónir í viðbyggingu á Skaftafellsstofu, aðrar 35 milljónir í veitingaaðstöðu, 25 milljónir í þjónustuhús á tjaldstæði og sitthvorar 10 milljónirnar í nýja salernisaðstöðu á svæðinu. Þá verða 5 milljónir settar í útsýnispall við Hundafoss.

156,5 milljónir fara í uppbyggingu á Þingvöllum, en stærstu einstöku verkefnin þar eru gróðurvernd við Flosagjá, Nikulásargjá og Spöngina, gerð göngustíga á Gjábakkasvæði og Arnarfelli, stýring fyrir bílastæði á svæðinu og stækkun bílastæðisins við Hakið.Þá fara 25 milljónir í nýjan útsýnispall við Langastíg.

50 milljónir í Geysissvæðið

Á Gullfosssvæðinu verður 15 milljónum varið í nýja göngustíga og útsýnispall á efra svæðinu. Öðrum 19 milljónum er varið í önnur minni verkefni á svæðinu. Við Geysi eru 50 milljónir eyrnamerktar heildaruppbyggingu á svæðinu og við Dyrhólaey fara 15 milljónir í bílastæði og 16 milljónir í salernishús.

Einnig verður sett 21 milljón til að efla starf landvarða um allt land.

Frétt mbl.is: 850 milljónir í brýn verkefni

Úthlutað verður 850 milljónum til verkefna á 52 stöðum víðsvegar um land. Stærstu verkefnin eru á Þingvöllum og í Skaftafelli.

50 milljónir fara í heildaruppbyggingu við Geysi í Haukadal. Golli / Kjartan Þorbjörnsson

Hnotskurn

• Arnarstapi - 8,5 milljónir
• Borgarvirki - 3 milljónir
• Dettifoss vestur - 25 milljónir
• Dimmuborgir - 38,5 milljónir
• Dynjandi - 34,5 milljónir
• Dyrhólaey - 31 milljónir
• Fiskibyrgin Gufuskálum - 6 milljónir
• Fjallabak - 20 milljónir
• Flókatóftir - 5  milljónir
• Galtastaðir í Hróarstungu - 10 milljónir
• Geysir - 50 milljónir
• Glaumbær - 5 milljónir
• Grábrók - 3,5 milljónir
• Gullfoss - 34 milljónir
• Hegranesþingstaður - 3 milljónir
• Helgustaðanáma - 6 milljónir
• Hjálparfoss - 6 milljónir
• Hlíðarrétt - 5 milljónir
• Hofstaðir - 5 milljónir
• Hólar í Hjaltadal
• Hringsdalur - 5 milljónir
• Hrútshellir - 4 milljónir
• Hvannalindir - 10 milljónir
• Hverfjall - 16,2 milljónir
• Hveravellir - 2 milljónir
• Kattarauga 1,9 milljónir
• Kristnes 0,5 milljónir
• Laufás - 7 milljónir
• Laugarvatn - 10 milljónir
• Litla skarð - 2 milljónir
• Litlibær - 3 milljónir
• Mývatn - 7 milljónir
• Naustin Papafirði - 5 milljónir
• Seljavallalaug - 5 milljónir
• Skaftafell - 160 milljónir
• Skútustaðagígar - 5,3 milljónir
• Sómastaðir við Reyðarfjörð - 13,5 milljónir
• Snorralaug - 5,5 milljónir
• Snæfell - 7 milljónir
• Steinahellir - 4 milljónir
• Stóru Akrar - 3,5 milljónir
• Stöng í Þjórsárdal - 30 milljónir
• Teigarhorn - 22 milljónir
• Vaglaskógur - 7 milljónir
• Vatnsfjörður - 5 milljónir
• Vikraborgir - 5 milljónir
• Þingeyrar og Vatnsdalur - 3 milljónir
• Þingvellir - 156,5 milljónir
• Þverá í Laxárdal - 8 milljónir
• Þórsmörk - 10 milljónir
• Örlygsstaðir - 3 milljónir

Tengdar fréttir

Ferðamenn á Íslandi

Ferðaþjónusta aldrei vegið þyngra í landsframleiðslu

• Innviðir komnir að þolmörkum
• „Var lengi vel eini vinur ferðaþjónustunnar“
• „Hækkun VSK á ferðaþjónustu er þjóðhagslegt óráð“
• Mikill áhugi ferðamanna á þyrluflugi

» Fleiri tengdar fréttir

• Blogga um frétt