Reimar Pétursson hæstaréttarlögmaður var kjörinn formaður Lögmannafélags Íslands á aðalfundi félagsins í gær. Hann tekur við starfinu af Jónasi Þóri Guðmundssyni, sem gegnt hefur formennsku síðastliðin þrjú ár.
Samkvæmt reglum félagsins má formaður eingöngu sitja í þrjú ár samfellt.
Formennska í Lögmannafélaginu er ólaunað starf og sinnir hlutaðeigandi lögmaður því embættinu samhliða almennum lögmannsstörfum sínum.
Reimar er einn eigenda Lögmanna Lækjargötu. Hann lauk embættisprófi í lögfræði frá Háskóla Íslands árið 1998 og hlaut réttindi til málflutnings fyrir héraðsdómi sama ár. Hann hlaut LL.M. gráðu frá Columbia-háskólanum í New York árið 2003, en ári síðar hlaut hann bæði réttindi til málflutnings fyrir Hæstarétti og í New York ríki.
Lögmannafélag Íslands var stofnað árið 1911. Félagið kemur fram fyrir hönd lögmanna gagnvart dómstólum og stjórnvöldum um þau málefni sem stétt þeirra varða, setur siðareglur fyrir lögmenn og fer með tiltekið eftirlit með störfum þeirra.
Skylduaðild er að félaginu fyrir þá lögfræðinga sem hafa lögmannsréttindi, þ.e. réttindi sem héraðsdómslögmenn og hæstaréttarlögmenn. Félagsmenn eru nú um 1.060 talsins.
Frétt mbl.is: Hættir sem formaður Lögmannafélagsins