Hrósar starfsfólki Landspítalans

Páll Matthíasson, forstjóri Landspítalans þakkar starfsfólki spítalans sérstaklega fyrir frábæra frammistöðu og að hafa hlaupið til, jafnvel af kjarasamningafundi, til að aðstoða eftir alvarlegt slys sem varð við Hellissand í gær. Þetta kemur fram í föstudagspistli hans sem birtist á heimasíðu spítalans.

Segir Páll að verkföll BHM og hjúkrunarfræðinga hafi gífurleg áhrif á starfsemi spítalans, þar sem allar stéttir gegna lykilhlutverki í flókinni meðferðakeðju sjúklinga. Sagði hann að margir innan þessa geira hafi valið hann af einlægum áhuga, jafnvel hugsjón og því geti skrefin frá sjúkrabeði sjúklinga verið þung.

Í gær hafi svo innri maður starfsfólksins komið í ljós þegar kalla þurfti út verulegan auka mannskap; á myndgreiningu, bráðamóttöku, svæfingu, vöknun, gjörgæslu og jafnvel víðar. Um 20 starfsmenn, þar af margir í verkfalli, voru kallaðir út með örskömmum fyrirvara, segir Páll í bréfinu. Segir hann að ekki hafi staðið á viðbrögðum sem hafi hoppað til á örskotsstund.

„Ég vil þakka ykkur öllum frábæra frammistöðu, þar sem starfsfólk Landspítala sýndi enn og aftur hvílíkur kraftur býr í fagmennsku og einbeittum vilja þeirra sem vilja  láta gott af sér leiða,“ segir Páll í loki bréfsins.

• Blogga um frétt