Enn hefur enginn fundur verið boðaður í kjaradeilu Félags íslenskra hjúkrunarfræðinga og ríkisins, en félagið sleit viðræðum við samninganefnd ríkisins á föstudag. Ólafur G. Skúlason, formaður félagsins, segir stöðuna óbreytta síðan fyrir helgi.
Hann segir boltann alfarið vera hjá ríkinu og samninganefnd félagsins bíði eftir því að raunhæft tilboð komi á borðið. Ríkissáttasemjari hafi þó haft samband við báða deiluaðila í dag en þeir hafi verið sammála um að ekki væri tilefni til að funda. Ekki er ljóst hvenær næsti fundur verður boðaður.
Ríkið lagði fram tilboð í síðustu viku sem hefði gert það að verkum að eftir fjögur ár væru byrjunarlaun hjúkrunarfræðinga 359 þúsund og að sögn Ólafs er það ekki eitthvað sem félagsmenn hefðu samþykkt. Samninganefnd félagsins lagði því fram aðra útfærslu sem ríkið var ekki samþykkt svo ekki var grunnur til að halda viðræðunum áfram. Ólafur segir samninganefndina þó skoða hlutina sín megin nú og vonandi geri samninganefnd ríkisins slíkt hið sama.
„Nú erum við bara að bíða eftir að ríkið komi með eitthvað raunsætt á móti svo við getum farið að skoða þetta af einhverri alvöru,“ sagði hann í samtali við mbl.is í gær. Þá sitji stjórn félagsins ekki auðum höndum þar sem gríðarleg vinna fylgi því að halda utan um verkfall 2.100 félagsmanna þess.