Vala Ingimarsdóttir, stjórnmálafræðingur og framkvæmdastjóri, lést á líknardeild Landspítalans í Kópavogi aðfaranótt mánudagsins 1. júní sl., 41 árs að aldri.
Vala fæddist í Reykjavík 28. janúar 1974 og ólst þar upp við Flókagötuna. Foreldrar hennar eru Ingimar Jóhannsson, fyrrverandi skrifstofustjóri í sjávarútvegs- og landbúnaðarráðuneytinu, og Lillý Valgerður Oddsdóttir ritari.
Vala lauk stúdentsprófi frá Verzlunarskóla Íslands 1994, lærði þýsku í Hamborg, stundaði síðan nám í stjórnmálafræði og viðskiptafræði við Háskóla Íslands og við University of North Texas og lauk BA-prófi í stjórnmálafræði frá Háskóla Íslands 1999.
Vala var sölustjóri hjá Alþjóðalíftryggingafélaginu 1999-2001 og starfaði síðan hjá Kaupþingi með hléum til 2006.
Árið 2007 stofnuðu þau Vala, Garðar Guðmundsson, heila- og taugaskurðlæknir, Finnbogi Rútur Þormóðsson, doktor í taugalíffræði, og ýmsir fjárfestar fyrirtækið ValaMed en hún var framkvæmdastjóri fyrirtækisins á árunum 2009-2012. Fyrirtækið er rannsóknarfyrirtæki sem miðar að hnitmiðaðri lyfjameðferð við krabbameini með því að gera lyfjanæmispróf á krabbameinsfrumum viðkomandi sjúklinga fyrir meðferð.
Vala gegndi ýmsum trúnaðarstöðum fyrir Sjálfstæðisflokkinn. Hún var varaformaður miðstjórnar Sjálfstæðisflokksins 2012-2013. Hún var formaður Hverfisráðs Vesturbæjar hjá Reykjavíkurborg 2007-2010 sem fulltrúi Sjálfstæðisflokksins og sat í ráðinu 2013-2014. Hún sat í stjórn Heimdallar 1994-96, var varaformaður Hverfafélags sjálfstæðismanna í Háaleiti 2002-2004 og síðar varaformaður Hverfafélags sjálfstæðismanna í Nes- og Melahverfi auk þess sem hún hefur setið í fulltrúaráði Sjálfstæðisflokksins í áraraðir.
Eiginmaður Völu er Bjarni Þórður Bjarnason, verkfræðingur og aðstoðarframkvæmdastjóri Arctica Finance.
Börn Völu og Bjarna Þórðar eru Bryndís Líf, f. 31.10. 2002, og Ingimar Stefán, f. 27.9. 2007.