Arnarvarp hefur farið vel af stað á landinu í ár með metfjölda hreiðra í varpi, 51, sem er einu fleira en í fyrra sem var einnig metár síðan talningar hófust.
Þó þykir ástæða til að hafa áhyggjur af varpinu í ár þar sem spáð er stífri norðanátt á næstunni, meðan varptíminn stendur sem hæst, að því er fram kemur í umfjöllun um arnarvarpið í ár í Morgunblaðinu í dag.
Íslenski haförninn hefur varp sitt upp úr apríl og hefja ungarnir sig ekki til flugs fyrr en í ágúst. Stofninn hefur verið á uppleið síðustu ár þó fjöldi unga sem komast á legg sveiflist mikið ár frá ári og vissum arnarpörum gengur mun betur en öðrum að koma ungum á legg.