Kvikmyndavefurinn YouTube og íslensku höfundaréttarsamtökin STEF hafa gert með sér samning þess efnis að meðlimir STEFs, sem og erlendra systursamtaka, munu geta fengið greitt fyrir notkun tónlistar sinnar á YouTube hér á landi. Í því felst að meðlimir STEFs og tengdir aðilar munu geta fengið greitt þegar tónlist þeirra aflar tekna með spilun eða birtingu auglýsinga á YouTube.
„Þessi nýja tekjuleið eykur möguleika á fjárhagslegum ávinningi rétthafa á notkun verka þeirra á YouTube á Íslandi. Það að ná samningi við YouTube markar þáttaskil í að skapa ný tækifæri fyrir okkar rétthafa,“ er haft eftir Guðrúnu Björku Bjarnadóttur, framkvæmdastjóra STEFs, í fréttatilkynningu. Haft er eftir Gudrun Schweppe, framkvæmdastjóra leyfismála hjá YouTube EMEA, að fyrirtækið sé mjög ánægt með að hafa náð samningi við STEF.