Fá að fjárfesta fyrir tíu milljarða

Bjarni Benediktsson og Sigmundur Davíð Gunnlaugsson á fundinum í Hörpu.
Bjarni Benediktsson og Sigmundur Davíð Gunnlaugsson á fundinum í Hörpu. mbl.is/Golli

Samkvæmt áætlun ríkisstjórnarinnar um losun fjármagnshafta munu lífeyrissjóðir fá að fjárfesta fyrir tíu milljarða króna á ári í erlendum eignum til ársins 2020 sem jafngildir fjórðungi af hreinu innstreymi þeirra á tímabilinu. Heimildin verður lögfest fyrir lok ársins sem skref í afnámi fjármagnshafta og verður mögulega aukin eftir því sem afnáminu vindur fram.

Þetta var á meðal þess sem fram kom í máli Benedikts Gíslasonar og Sigurðar Hannessonar, vafaformanna framkvæmdahóps um losun fjármagnshafta, á blaðamannafundi í Hörpu í hádeginu.

Þeir sögðu að aukin erlend fjárfesting lífeyrissjóðanna stuðlaði að auknum viðskiptaafangi og teldist því þjóðhagslega hagkvæm.

Hreint árlegt innstreymi íslenska lífeyrissjóðakerfisins nemur fjörutíu milljörðum króna á ári.

Það er deginum ljósara að mikil uppsöfnuð þörf er hjá almenningi, íslenskum fyrirtækjum og lífeyrissjóðum til að fjárfesta erlendis eftir sjö ára fjármagnshöft. Fram kom í máli tvímenninganna að að loknum aðgerðum stjórnvalda gagnvart slitabúum og aflandskrónueigendum yrði slakað á höftum fyrst og fremst til að auka erlendan sparnað og styrkja samkeppnishæfni.

Varúðarreglur og rýmri magntakmarkanir myndi taka við af fjármagnshöftum.

Þeir bentu einnig á að öll vöru- og þjónustuviðskipti yrðu áfram undanþegin fjármagnshöftum eins og verið hefur.

Hvað varðar einstaklinga, þá stendur til að veita víðtæka rýmkun á reglum um höftin á haustþingi með tilslökunum sem munu hafa áhrif á alla innan haftanna. Fyrirtæki fá síðan heimildir til beinna fjárfestinga erlendis.

Almenna reglan verður sú að gjaldeyrisviðskipti einstaklinga verða frjáls nema þau séu sérstaklega bönnuð vegna magntakmarkana.

Sigurður Hannesson, varaformaður framkvæmdahóps um losun fjármagnshafta.
Sigurður Hannesson, varaformaður framkvæmdahóps um losun fjármagnshafta. mbl.is/Golli
mbl.is
Fleira áhugavert
Fleira áhugavert