Innlent | mbl | 23.6.2015 | 19:25

Makrílfrumvarpið aðeins til 1 árs

Sigurður Ingi Jóhannsson sjávarútvegs- og landbúnaðarráðherra.

Breytingatillaga við makrílfrumvarp sjávarútvegsráðherra gerir nú ráð fyrir því að makríll verði aðeins kvótasettur til eins árs, en ekki þriggja eins og áður hafði verið lagt til. Tillagan er nú í kynningu hjá atvinnuveganefnd Alþingis. Þetta kom fram í máli Sigurðar Inga Jóhannssonar, sjávarútvegsráðherra, í kvöldfréttum RÚV.

Þegar frumvarpið var upphaflega lagt fram var gert ráð fyrir að kvótasetningin yrði til sex ára, en því var seinna breytt í þrjú ár. Mikil óánægja hefur þó verið með það meðal stjórnarandstöðunnar og þá var einnig sett á fót undirskriftarsöfnun sem 51 þúsund manns skrifuðu undir, en því var beint gegn frumvarpinu.

Í fréttum RÚV sagði Sigurður að þessi breytingartillaga væri meðal annars til að koma til móts við þessar kröfur og þá myndi hún væntanlega liðka fyrir samkomulagi um þinglok.