„Mín skoðun er sú að ef opinber stofnun býður ekki út, þá er hún með of há fjárframlög vegna þess að í útboðum býðst að spara á sársaukalausan hátt.“
Þetta segir Guðlaugur Þór Þórðarson, varaformaður fjárlaganefndar í Morgunblaðinu í dag, en nefndin hefur sent út bréf til ráðuneytanna um að hún telji að töluvert vanti upp á að stofnanir og ráðuneyti nýti sér hagræðingarmöguleika sem felast í endurbótum á innkaupa- og útboðsmálum.
„Sem dæmi má nefna að vísbendingar eru um að í 40% af innkaupum ríkisins sé verslað utan laga um opinber innkaup,“ segir í bréfinu en þar er þess farið leit við ráðuneytin að þau fari í umfangsmikla upplýsingaöflun um útboðsmál stofnana á þeirra vegum. Guðlaugur Þór bendir á að ef stofnanir telji sig ekki þurfa að versla á hagkvæman hátt þá hljóti fjárframlög að vera of há.