285 starfsmenn á Landspítalanum hafa sagt upp störfum síðustu vikur, þar af 235 hjúkrunarfræðingar. Flestar eru uppsagnirnar á aðgerðasviði spítalans, eða 81 uppsögn. Lífeindafræðingar, ljósmæður og geislafræðingar hafa einnig sagt störfum sínum lausum.
Samkvæmt tölum frá Landsítalanum hefur 81 hjúkrunarfræðingur á aðgerðasviði spítalans sagt starfi sínu lausu, 24 hjúkrunarfræðingar á flæðisviði, 14 á geðsviði, 22 á kvenna- og barnasviði, 49 á lyflækningasviði og 45 hjúkrunarfræðingar á skurðlækningasviði.
Frétt mbl.is: Fagfólk ekki tínt af trjánum
24 starfsmenn innan Félags lífeindafræðinga sem starfa á spítalanum hafa sagt upp störfum Af þeim starfaði tuttugu og einn á rannsóknarsviði og þrír á skurðlækningasviði. Tvær ljósmæður hafa sagt starfi sínu lausu og tuttugu og fjórir geislafræðingar.
Í Morgunblaðinu í dag greinir Páll Matthíasson, forstjóri Landspítalans, frá því, að erlendir sérfræðingar muni leysa nokkra sérhæfða starfsmenn af í nokkrar vikur í sumar, þannig að hægt verði að framkvæma nauðsynlegustu hjartaaðgerðirnar. Þetta sé þó dýrt úrræði og aðeins gert í neyð.
Hann heldur áfram: „Lífeindafræðingar á spítalanum eru mjög sérhæft fagfólk, ekki síst þeir sem voru að segja upp á sýkladeild. Þetta er ekki fólk sem maður tínir af trjánum. Það sama gildir um annað fagfólk. Um er að ræða sérmenntað fólk, oft með fágæta fagmenntun.
Atkvæðagreiðsla um nýjan kjarasamning Félags íslenskra hjúkrunarfræðinga fer fram dagana 4. júlí til kl. 12 þann 15. júlí. Kjaradómur verður skipaður í dag vegna kjaradeilu Bandalags háskólamanna við ríkið þar sem samningar náðust ekki fyrir mánaðarmót.