Tilkynnt var um innbrot í bifreið við Skipholt á fjórða tímanum í nótt. Ungur maður í annarlegu ástandi var handtekinn á vettvangi og var hann með muni sem hann hafði stolið úr bifreiðinni. Maðurinn er vistaður í fangageymslu á meðan ástand hans lagast og hægt verður að ræða við hann.
Þá var ölvaður maður handtekinn við Þórsgötu rétt fyrir klukkan fjögur í nótt. Maðurinn vildi ekki aðspurður á vettvangi gefa lögreglumönnum upp nafn eða kennitölu. Hann var vistaður í fangageymslu á meðan ástand hans batnar og hægt verður að ræða við hann.
Klukkan níu í gærkvöldi hafði lögregla afskipti af manni á heimili í Grafarvogi vegna gruns um fíkniefnabrot. Maðurinn framvísaði ætluðum fíkniefnum.
Um klukkan hálft tíu var maður í annarlegu ástandi handtekinn í Hraunbæ grunaður um líkamsárás eða heimilisofbeldi gegn fyrrverandi sambýliskonu.
Þá voru fjórir ökumenn stöðvaðir, grunaðir um akstur undir áhrifum áfengis eða fíkniefna, í höfuðborginni í nótt.