Þyrla Landhelgisgæslunnar sótti örmagna ferðamann í Þjófadali vestan við Hveravelli um hádegi og flytur hann nú á Landspítalann. Björgunarsveitir Slysavarnafélagsins Landsbjargar af Suður- og Norðurlandi hugðust sækja manninn fyrr í dag, en komust ekki að honum vegna lélegrar færðar.
Óskað var eftir aðstoð vegna mannsins eldsnemma í morgun og voru björgunarsveitarmenn mættir á svæðið um klukkan 10. Þar sem færð og aðstæður á hálendinu eru með erfiðara móti var ákveðið að sækja að staðnum frá tveimur áttum.
Þegar staðsetning mannsins var orðin ljós hugðust björgunarsveitarmenn sækja hann, en fjórhjól þeirra festust í krapa og drullu á leiðinni og var þyrla Landhelgisgæslunnar því kölluð til. Björgunaraðgerðirnar gengu hægt, en maðurinn er nú kominn um borð í þyrluna samkvæmt upplýsingum frá Landsbjörg.
Frétt mbl.is: Sækja örmagna ferðamann