Vetrarfærð er nú á leiðinni inn í Hrafntinnusker

„Á þessum tíma í fyrra keyrði maður á auðu alla leiðina inn í Hrafntinnusker, nema bara rétt síðasta spölinn,“ segir Sigurður Harðarson, rafeindavirki og fjallamaður.

„Nú er þetta allt á kafi í snjó og allt upp í tíu metra snjódýpt. Ég sé ekki að þessi snjór fari héðan af,“ bætir hann við í Morgunblaðinu í dag.

Sigurður er nýbúinn að setja upp búnað til að ná GSM-merki í skála Ferðafélags Íslands í Hrafntinnuskeri og eins í skálunum í Hvanngili, Álftavatni og Emstrum. Þetta er fyrsta sumarið sem nota verður stafræna posa til að taka við kortagreiðslum því það er búið að leggja niður gömlu vélarnar sem straujuðu kortin.