Innlent | mbl | 30.7.2015 | 14:54 | Uppfært 31.7.2015 11:11

Furða sig á málflutningi lögreglustjóra

Brekkusöngur á Þjóðhátíð. mbl.is/Guðmundur Sveinn Hermannsson

Þetta kemur fram í tilkynningu frá BÍ og FF.

Í ályktun félaganna segir m.a. að það sé skylda fjölmiðla að segja frá ofbeldisglæpum og það þjóni aðeins hagsmunum ofbeldismanna að þegja um þá. Félögin segja það samfélagslega og lýðræðislega skyldu lögreglu og annarra viðbragðsaðila að greina skilmerkilega frá því sem gerist og þykir fréttnæmt á þjóðhátíð, í þágu þeirra sem sækja hátíðina heim og heimamanna í Vestmannaeyjum.

Ályktunin í heild:

Stjórnir Blaðamannafélags Íslands og Félags fréttamanna lýsa yfir furðu sinni á málflutningi lögreglustjórans í Vestmannaeyjum og þeim sjónarmiðum sem liggja honum til grundvallar varðandi fréttaflutning af kynferðisbrotamálum sem upp kunna að koma á Þjóðhátíð. Sú tilraun til þöggunar sem þar er lögð til er algerlega úr takt við þau meginsjónarmið um upplýsta og opna umræðu sem lýðræðissamfélög hljóta að styðjast við vilji þau standa undir nafni. Það er skylda fjölmiðla að segja frá ofbeldisglæpum og það þjónar hagsmunum engra nema ofbeldismannanna að þegja um þá. Um það þekkjum við því miður alltof mörg dæmi frá liðnum áratugum. Það er engin betri aðferð til að fyrirbyggja og lágmarka ofbeldi heldur en að tala um það af hreinskilni. Hvernig eigum við með öðrum hætti að takast á við fordóma og ranghugmyndir og fyrirbyggja gróusögur af öllu tagi? Stjórnir BÍ og FF hvetja lögreglu og aðra viðbragðsaðila til þess að ræða þau ofbeldisbrot, kynferðisbrot jafnt sem önnur, sem upp kunna að koma á þjóðhátíð með opinskáum hætti með hagsmuni almennings að leiðarljósi. Það er beinlínis samfélagsleg og lýðræðisleg skylda þeirra að greina skilmerkilega frá því sem gerist og fréttnæmt þykir á þjóðhátíð í þágu þeirra sem sækja hátíðina heim og heimamanna í Vestmannaeyjum.

Reykjavík 30. júlí 2015