Veðurfræðingur Vegagerðarinnar segir að í storminum sem von er á í dag megi búast við hviðum, 30-35 m/s, allt til kvölds suðaustanlands, meðal annars í Öræfasveit, í grennd við Hornafjörð og Hvalnes.
Síðdegis og í kvöld einnig hviður þvert á veg á sunnanverðu Snæfellsnesi. Þá er varað við sandfoki á hálendinu sérstaklega á Sprengisandsleið og svæðinu norðan Landmannalauga.
Líkt og fram kom á mbl.is í morgun er varað við því að í dag megi búast við allt að 18 m/s og snörpum vindhviðum sunnan Vatnajökuls og á sunnanverðum Austfjörðum. Síðdegis má einnig búast við allt að 18 m/s á Snæfellsnesi, við Breiðafjörð og á Vestfjörðum. Vindur af þessum styrk getur verið varasamur fyrir farartæki sem taka á sig mikinn vind.