Líðan mannsins sem slasaðist alvarlega í bílslysi á Suðurlandsvegi er eftir atvikum og er honum haldið sofandi í öndunarvél, að sögn vakthafandi læknis á gjörgæsludeild Landspítalans í Fossvogi.
Banaslys varð á Suðurlandsvegi við ána Klifanda skammt austan Péturseyjar síðdegis í gær. Fjórir erlendir ferðamenn voru í bifreiðinni og var farþegi bifreiðarinnar úrskurðaður látinn á vettvangi. Ökumaður slasaðist alvarlega og var fluttur með þyrlu Landhelgisgæslunnar á Landspítalann í Fossvogi. Meiðsli annarra farþega eru minni.
Tildrög slyssins eru óljós en lögreglan á Suðurlandi hefur auglýst eftir vitnum að slysinu.