Lögreglan lagði hald á mikið magn stera í umfangsmiklum aðgerðum sínum í fyrradag en enn á eftir að telja saman hversu mikið magn efna var á ferðinni og efnagreina það. Aldís Hilmarsdóttir, yfirmaður fíkniefnadeildar lögreglunnar á höfuðborgarsvæðinu, segir grun leika á að efnin hafi verið unnin áfram á Íslandi.
Húsleitir voru gerðar á allnokkrum stöðum á höfuðborgarsvæðinu, og ein í Reykjanesbæ með aðstoð lögreglunnar á Suðurnesjum. Rannsókn málsins er umfangsmikil og hefur staðið yfir um nokkurt skeið, en hún er unnin í samvinnu við embætti tollstjóra.
Aðgerðirnar voru hluti af alþjóðlegri lögregluaðgerð Europol gegn innflutningi á ólöglegum sterum frá Kína. Aldís Hilmarsdóttir, yfirmaður fíkniefnadeildar lögreglunnar á höfuðborgarsvæðinu, segir að grunur leiki á að hluti steranna sem barst hingað til lands hafi verið unninn áfram hér.
Fólkið sem var handtekið í fyrradag er flest á fertugsaldri, átta karlar og ein kona. Aldís segir að því hafi öllu verið sleppt að loknum yfirheyrslum.
Fyrri frétt mbl.is: Níu handteknir á Íslandi