Störf fjölda fólks sett í uppnám

Vinstri-grænir í Skagafirði lýsa andstöðu við að gengið verði lengra í afnámi tolla á innfluttar landbúnaðarafurðir án fyrirliggjandi úttektar á áhrifum á íslenska landbúnaðarframleiðslu og án þess að gerður hafi verið nýr búvörusamningur til lengri tíma. Þetta kemur fram í ályktun sem samþykkt var á aðalfundi félagsins í gær.

„Matvælaframleiðsla er ein meginstoð byggðar í Skagafirði. Héraðið er eitt sterkasta mjólkur og kjötframleiðslusvæði landsins. Margvíslegur þjónustuiðnaður hefur byggst upp í kringum matvælaiðnaðinn. Ferðaþjónusta og matarmenning er miklvæg grein í örri þróun. Þessar greinar skipta sköpum fyrir búsetu og afkomu íbúa héraðsins,“ segir ennfremur. Fram kemur að fréttir af nýgerðum milliríkjasamningi við Evrópusambandið um viðskipti með búvörur og niðurfellingu tolla veki því upp ugg um framtíðarhorfur landbúnaðar og matvælaiðnaðar í Skagafirði.

„Afnám tolla í þeim mæli sem samningarnir gera ráð fyrir geta haft ófyrirséðar afleiðingar í för með sér fyrir innlendan landbúnað og matvælavinnslu. Samningurinn við ESB virðist gerður án samráðs og í algjörri andstöðu við gildandi samninga um starfskilyrði greinarinnar sem og stefnu stjórnvalda um matvælaframleiðslu á Íslandi. Stjórnvöld virðast einnig hafa vanrækt að gera fyrirfram heildræna úttekt á áhrifum samningsins á vöruframboð þróun og samkeppnisstöðu einstakra búgreina til lengri tíma. Atvinnuöryggi og störf fjölda fólks er sett í uppnám sem og rekstur afurðastöðva og fyrirtækja í matvælavinnslu, og iðnaði.“

Meta þurfi áhrif „á afurðaverð til bænda, líklega þróun á markaðshlutdeild innlendrar framleiðslu og tekjuleg áhrif að teknu tillit til áhrifa aukins markaðsaðgangs“ áður en lengra sé haldið. Störf og afkoma fjölda bænda og starfsfólks í úrvinnslugreinum séu í húfi. Skorar fundurinn á þingmenn að taka málið upp og staðfesta ekki slíka samninga án þess að fyrst hafi verið gengið frá nýjum samningum um starfsskilyrði landbúnaðarins til lengri tíma.

„Núverandi búvörusamningur rennur út í lok næsta árs. Fyrirkomulag tolla hefur verið hluti slíkra samninga og því eðlilegt að ákvarðanir um breytingar á þeim séu teknar samhliða gerð nýrra langtímasamninga um starfskilyrði landbúnaðar og matvælavinnslu í landinu.“

• Blogga um frétt