Síðdegis í gær höfðu borist 3.557 lundapysjur í vigtun hjá pysjueftirlitinu í Sæheimum í Vestmannaeyjum. Farið er að draga úr pysjustraumnum.
Örn Hilmisson, starfsmaður Sæheima og öryggisstjóri á Hásteinsvelli, þurfti að tína sandsíli og sævesluseiði af vellinum fyrir leik ÍBV og ÍA sl. laugardag.
Lundar höfðu misst þau á völlinn. Þeir bera enn æti í pysjur sínar og því getur sú von ræst að tvöfalt fleiri lundapysjur berist í ár til pysjueftirlitsins en árið 2012 þegar þær voru 1.830, að því er fram kemur í Morgunblaðinu í dag.