Vegfarendur í Reykjavík hafa eflaust tekið eftir fjölmörgum nýjum veggjalistaverkum í miðborginni. Um er að ræða samstarfsverkefni Iceland Airwaves og listamiðstöðarinnar Urban Nation Berlin þar sem tónlistarmenn sem koma fram á hátíðinni fóru í samstarf við listamenn og létu þá fá texta, lag eða ljóð sem þeir áttu svo að túlka í vegglistaverki.
Verkefnið nefnist Wall Poetry, eða veggjaljóð. Samkvæmt frétt á vefsíðu Iceland Airwaves segir að sýningarstjórinn, Yasha Young frá Urban Nation Berlin hafi viljað tengja saman sköpunarkraft fólks víðs vegar að úr heiminum. Henny María Frímannsdóttir frá Iceland Airwaves sá um að velja tónlistarfólk sem spilar á Iceland Airwaves 2015 sem var svo parað saman við alþjóðlega götulistamenn sem Young valdi.
Á meðal þeirra tónlistarmanna eða hljómsveita sem veittu listamönnunum innblástur við veggjalist sína voru Úlfur Úlfur, John Grant, Gus Gus, Mercury Rev og Gísli Pálmi.
Flestöll listaverkin eru nú tilbúin og ljá miðborginni skemmtilegan blæ.
Iceland Airwaves hátíðin á sér stað 4- 8 nóvember.