Siglufjarðarvegi úr Fljótum um Almenninga og veginum um Ólafsfjarðarmúla var lokað í gær vegna snjóflóða og frekari hættu á þeim. Þá var allt á kafi í snjó í bæjum á Tröllaskaga. Þar snjóaði mikið um helgina og götur á Siglufirði voru ófærar. „Hér eru flestar götur færar. Við höfum oft séð þetta verra,“ sagði Birgir Ingimarsson, bæjarverkstjóri í Fjallabyggð. Í gær fór sitthvað úr skorðum nyrðra vegna veðurs og aðventuviðburðum var aflýst.
Í dag er gert ráð fyrir þokkalegu veðri á landinu. Búast má við hægri norðanátt og minniháttar éljagangi á Norðurlandi og svipuðu suðvestanlands. Á morgun, þriðjudag, fer að hvessa af austri og norðaustri og þá er líklegt að lausasnjór fari að fjúka. Nær það til alls vestanverðs landsins, úr suðri og vestur á firði og gæti því fylgt einhver röskun svo sem á samgöngum. Þessi spá er hins vegar háð ýmsum fyrirvörum. Snjókoman gæti jafnvel orðið slydda því skammt sunnan við land er mildara loft og nái það að ströndu hlánar.
Annars er frost í kortunum fyrir alla vikuna. Syðra verður gaddurinn um fimm stig, en austanlands gæti hann farið niður í fimmtán stig, segir á vef Veðurstofu Íslands.
Snjór er nú yfir öllu höfuðborgarsvæðinu og allan laugardaginn voru snjóruðningsmenn á fullu við að ryðja götur og torg. Greiðfært var í borginni í gær en það gæti breyst ef hreyfir vind.
Í gærkvöldi var send út tilkynning frá sorphirðudeild borgarinnar þar sem fólk var beðið um að moka frá ruslatunnum og geymslum og auðvelda þannig störf við sorphirðu.