Nokkurra jarðskjálfta varð vart í Bárðarbungu í nótt. Mældist sá stærsti 3,5 stig á Richter kvarðanum, klukkan 02.23. Þá varð annar skjálfti fáeinum mínútum síðar, klukkan 02.27. Mældist sá 3,1 stig. Kemur þetta fram í tilkynningu frá Veðurstofunni.
Þensla hefur verið á svæðinu í kringum Bárðarbungu undanfarna mánuði, sem þykir benda til kvikusöfnunar undir Bárðarbunguöskju. Hafa merki um þetta verið sífellt greinilegri. Slík þensla er hins vegar sögð algeng í nánd við eldstöðvar eftir eldgos.