„Það má segja að á undanförnum árum hafi Ísland yfir hátíðirnar orðið ný markaðsvara fyrir erlenda ferðamenn,“ segir Skapti Örn Ólafsson, upplýsingafulltrúi Samtaka ferðaþjónustunnar. Um ellefu þúsund erlendir ferðamenn dvelja á Íslandi yfir hátíðirnar í ár og má gera ráð fyrir að um 70% þeirra munu dvelja á suðvesturhorninu.
Hann segir ferðamennina fyrst og fremst koma til að skoða og upplifa íslenska náttúru. „Í ár hefur veðrið verið með ágætum og landið okkar skartað sínu fegursta. Þá má geta þess að höfuðborgin okkar Reykjavík er eina höfuðborgin í Evrópu sem er hvít í ár og það er ákveðinn bónus fyrir gestina okkar,“ segir Skapti Örn og bætir við að þúsundir erlendra ferðamanna fari í hefðbundnar dagsferðir á degi hverjum og í ár hafa norðurljósaferðirnar einnig verið vinsælar.
Skapti Örn segir opnunartíma verslana og þjónustuaðila yfir jól og áramót hafa breyst mikið undanfarin ár. „Ísland fyrir tíu árum og Ísland í dag er tvennt ólíkt, nú eru sífellt fleiri staðir opnir yfir hátíðirnar. Ef Ísland ætlar að vera áfangastaður yfir þennan tíma þá fylgir því að vera með opið yfir hátíðirnar.“
Samkvæmt spá Samtaka ferðaþjónustunnar er gert ráð fyrir að um 1,3 milljónir erlendra ferðamanna muni hafa lagt komu sína til Ísland þegar árið 2015 verður gert upp. Skapti Örn segir að um og yfir 20% vöxtur hafi orðið í ferðaþjónustunni á ári hverju undanfarin ár. „Það sem við viljum sjá er aukin dreifing ferðamanna yfir allt landið, ekki bara á sumrin heldur einnig yfir vetrartímann og ekki síst yfir jól og áramót.“
Davíð Ólafsson, framkvæmdastjóri Íslandshótela, tekur í sama streng og Skapti Örn og segir að töluverð aukning hafi orðið af ferðmönnum síðustu ár. „Það er ekki langt síðan við lokuðum hótelum yfir jólin, það hefur breyst mikið núna.“ Hann segir að í ár sé aðeins eitt af hótelum Íslandshótela lokað yfir hátíðirnar en áður fyrr hafi þau verið allt að þrjú.
Íslandshótel reka fimmtán hótel á Íslandi, Grand Hótel Reykjavík, Hótel Reykjavík Centrum og Best Western Hótel Reykjavík, Hótel Reykjadalur auk Fosshótelanna sem staðsett eru hringinn í kringum landið.
Hann segir öll hótelin fullbókuð yfir áramótin en það hafi þau einnig verið í fyrra. „Munurinn er þó sá að nú erum við búið að fjölga hótelum þannig að það eru fleiri herbergi sem búið er að fylla.“ Hann segir erlenda ferðamenn flykkjast til landsins til að fylgjast með sprengjuglöðum Íslendingum halda áramótin hátíðleg auk þess sem áramótabrennur séu vinsælar.
Davíð segir að þó svo að verið sé að opna mörg ný hótel í miðbænum virðist það ekki hafa áhrif né koma niður á nýtingu annarra hótela.
Gintare Siniauskaite, starfsmaður CenterHotels, segir sömu söguna og þeir Skapti Örn og Davíð. Hún segir öll hótel CenterHotels fullbókuð yfir hátíðirnar eins og áður. Munurinn sé aftur á móti sá að nú séu fleiri hótel í notkun en áður. „Það er brjálað að gera og öll keðjan fullbókuð.“