Frystitogarinn Kleifaberg RE er í slipp þessa dagana. Aflaverðmæti frystitogarans var nálægt 3,7 milljörðum króna í ár og er það trúlega mesta aflaverðmæti íslensks skips á árinu og eru uppsjávarskipin þá ekki undanskilin.
Nærri lætur að á hverjum degi ársins hafi fiskast fyrir 10 milljónir króna. Í ár hefur Kleifabergið sótt um 60% af afla sínum í lögsögu annarra ríkja.
Í norskri lögsögu hefur verið veitt fyrir um 500 milljónir króna og 1.400-1.500 milljónir í rússneskri lögsögu, en þar þarf að greiða fyrir veiðiheimildir að hluta. Á Íslandsmiðum hefur mikið verið veitt af ufsa.