Lögreglan var kölluð á heimili í Mosfellsbæ vegna heimilisofbeldis um hálfeittleytið í nótt. Málið er í vinnslu lögreglu en alls eru 49 mál bókuð hjá lögreglunni á höfuðborgarsvæðinu frá klukkan 19 í gærkvöldi til klukkan fimm í morgun.
Um ellefuleytið í gærkvöldi var líkamsárás tilkynnt til lögreglunnar. Sá sem varð fyrir ofbeldinu er með minniháttar meiðsl og er vitað hver ofbeldismaðurinn er.
Tveir menn voru handteknir í gærkvöldi og nótt vegna ölvunarástands og gista þeir báðir fangageymslur þar til af þeim rennur en annar þeirra á ekki í nein önnur hús að venda.
Um níu í gærkvöldi var ökumaður tekinn fyrir akstur undir áhrifum fíkniefna. Hann var látinn laus að lokinni blóðsýnatöku.
Ungmenni voru handtekin við veggjakrot á Hverfisgötu um hálftvö í nótt og er málið í vinnslu hjá lögreglu.