Mikil spenna í Útvarpshúsinu

Í kvöld fóru fram síðustu viðureignir fyrri umferðar í Gettu betur á Rás 2 og er óhætt að segja að mikil spenna hafi ríkt í Útvarpshúsinu í Reykjavík á meðan á keppni stóð - enda mikið í húfi.

Helstu úrslit kvöldsins urðu þau að lið Framhaldsskólans í Austur-Skaftafellssýslu sigraði lið Menntaskólans í Kópavogi með 27 stigum gegn 15 stigum MK. Lið Fjölbrautaskólans í Breiðholti hafði betur gegn lið Framhaldsskólans í Vestmannaeyjum og sigraði með 27 stigum gegn 17 stigum og lið Menntaskólans við Laugarvatn lagði lið Menntaskólans í Borgarfirði með 23 stigum gegn 9.

Sigurlið þessara viðureigna bættust í hóp þeirra sem eru komin áfram í aðra umferð ásamt liði Verzlunarskóla Íslands sem fór áfram sem stigahæsta tapliðið.

Að lokinni keppni í kvöld var dregið í viðureignir 2. umferðar sem fer fram næstkomandi mánudag og miðvikudag. Viðureignir drógust sem hér segir:

Á mánudag mun lið Menntaskólans við Hamrahlíð keppa við Flensborg, Fjölbrautarskóli Suðurnesja við Framhaldsskólann á Laugum og Fjölbrautarskóli Vesturlands á Akranesi við Menntaskólann á Ísafirði.

Á miðvikudag keppa svo Menntaskólinn á Akureyri við Verzlunarskóla Íslands, Fjölbrautaskólinn í Garðabæ við Menntaskólann að Laugarvatni, Framhaldsskólinn í Austur-Skaftafellssýslu við Menntaskólinn við Sund og Menntaskólinn í Reykjavík við Borgarholtsskóla.

Sigurlið 2. umferðar fara síðan áfram í sjónvarpshluta keppninnar sem hefst á Rúv 5. febrúar næstkomandi.

Spyrill í Gettu betur er Björn Bragi Arnarsson, spurningahöfundar og dómarar eru þau Bryndís Björgvinsdóttir og Steinþór Helgi Arnsteinsson, þeim til aðstoðar er Björn Teitsson. Með umsjón fer Elín Sveinsdóttir.

• Blogga um frétt