Björgunarskipið Hannes Þ. Hafstein frá Sandgerði kom til Njarðvíkurhafnar rétt fyrir klukkan tíu í kvöld með vélvana bát í togi. Á sjötta tímanum í dag hafði verið tilkynnt um bátinn við innsiglinguna í Sandgerðishöfn en tveir skipverjar voru um borð. Samkvæmt tilkynningu frá Landsbjörgu voru bjargir kallaðar út á fyrsta forgangi en fljótlega kom í ljós að bilaði báturinn var um sjómílu utar og því ekki eins mikil hætta á ferðum og fyrst var talið.
Um hálfri klukkustund eftir að útkallið barst var björgunarskipið komið með vélarvana bátinn í tog og sigldi með bátinn til Njarðvíkur. Að sögn Ólafar Snæhólm Baldursdóttur, upplýsingafulltrúar Landsbjargar gekk ferðin vel.
Fyrri frétt mbl.is: Siglir með vélvana bát til Njarðvíkur