Hömlur, dótturfélag Landsbankans, seldi nýverið Setbergslandið í Garðabæ til Byggingafélags Gylfa og Gunnars (BYGG) og var söluverðið einn milljarður og tuttugu og fimm milljónir króna.
Þetta staðfestir Steinþór Pálsson, bankastjóri Landsbankans, í umfjöllun um mál þetta í Morgunblaðinu í dag.
Steinþór segir að um opið og gagnsætt söluferli hafi verið að ræða. Fimm fasteignasölur hafi verið með Setbergslandið til sölu frá því í maí í fyrra. Einhver tilboð hafi borist á undanförnum misserum, en vegna fyrirvara í tilboðum, svo sem varðandi fjármögnun, hafi verið fallið frá þeim.