„Lýsir brengluðu viðhorfi“

„Það sem þarna sést lýsir brengluðu viðhorfi,“ sagði Ágúst Mogensen, rannsóknarstjóri hjá Rannsóknarnefnd samgönguslysa, í Kastljósþætti Ríkisútvarpsins í kvöld eftir að honum höfðu verið sýndar símaupptökur sem einstaklingar í röðum flutningabílstjóra hafa gert undir akstri og deilt sín á milli yfir netið. Fram kom í þættinum að aðstandendur hans hefðu að undanförnu safnað slíkum upptökum þar sem glæfraakstur sé meðal annars myndaður.

Fram kom í máli Ágústar að ekki væri spurning að framferði umræddra flutningabílstjóra væri ólöglegt og mikilvægt væri að tekið væri fastar á málum þar sem farsímar væru í notkun undir stýri. Lögreglan væri ekki að sinna þeim nægjanlega mikið. Þá þyrfti að hans mati að kanna hvort endurskoða þyrfti löggjöf í þessum efnum. Með þessu framferði væru bílstjórar bæði að stofna sér sjálfum í mikla hættu og öðrum í umferðinni. Rifjað var upp að sektir fyrir að nota farsíma undir stýri væri 5 þúsund krónur en 10 þúsund krónur fyrir að aka án öryggisbeltis.

Myndböndin, sem deilt er á Snapchat í hóp sem telur um eitt þúsund manns samkvæmt því sem fram kom í Kastljósþættinum, sýna akstur bæði í þéttbýli og dreifbýli. Meðal annars framúrakstur og við aðstæður þar sem umferð hefur verið mikil og aðstæður varhugaverðar. Nær undantekningalaust er um að ræða bílstjóra stórra fæutningabifreiða.

• 2 blogg um fréttina

Bloggað um fréttina

• Júlíus Már Baldursson: Segir ekkert um aksturinn eða upptökuna
• Ármann Birgisson: Er þetta aðal vandamálið ?