Rannsókn lögreglunnar á Suðurlandi á banaslysi sem varð í síðustu viku þegar 26 ára kínversk kona lést eftir köfunarslys í Silfru á Þingvöllum er í fullum gangi. Verið er að rannsaka köfunarbúnað konunnar auk þess sem niðurstöðu krufningar er beðið.
Slysið varð 26. janúar sl. Konan, sem var búsett í Bandaríkjunum, hafði verið ásamt manni sínum á vegum ferðaþjónustufyrirtækis að kafa í gjánni. Samkvæmt upplýsingum lögreglunnar á Suðurlandi sökk konan niður á um 30 metra dýpi og var henni eftir nokkurn tíma komið upp á yfirborðið meðvitundarlausri. Lögreglu barst tilkynning um slysið klukkan 12:42 og var kallað eftir aðstoð þyrlu Landhelgisgæslu Íslands sem flutti konuna á Reykjavíkurflugvöll þar sem sjúkrabíll beið og flutti hana á gjörgæsludeild Landspítalans. Þar var hún úrskurðuð látin í dag.
Þorgrímur Óli Sigurðsson, aðstoðaryfirlögregluþjónn á Suðurlandi, sagði í samtali við mbl.is í síðustu viku, að hluti köfunarbúnaðar konunnar hefði verið eftir á botni Silfru og komu sérsveitarmenn frá ríkislögreglustjóra, sérfræðingar Landhelgisgæslu og köfunarsveit slökkviliðs höfuðborgarsvæðisins á staðinn til að kafa eftir honum.
Tæknideild lögreglunnar á höfuðborgarsvæðinu rannsakar nú búnaðinn, samkvæmt upplýsingum frá lögreglunni á Suðurlandi. Þá hefur krufning farið fram og nú er beðið eftir skýrslu þar sem dánarorsök verði staðfest. Ekki liggur fyrir hvenær niðurstaða muni liggja fyrir. Það er hins vegar ljóst að niðurstaða muni ekki liggja fyrir í þessari viku.
Skýrslutökum lauk í síðustu viku.
Köfunarslys í Silfru hafa verið algeng síðustu ár og oft hefur mátt litlu muna, stundum hársbreidd á milli lífs og dauða. Er þetta þriðja banaslysið þar frá árinu 2010, en í desember 2012 lést þar Íslendingur og árið 2010 lést erlendur ferðamaður.