Sandfell SU-75 kom í fyrsta sinn til heimahafnar á Fáskrúðsfirði á fimmtudaginn. Báturinn fór í sinn fyrsta róður frá Fáskrúðsfirði eftir miðnættið í nótt.
Dótturfélag Loðnuvinnslunnar á Fáskrúðsfirði, Hjálmar hf., keypti bátinn af Stakkavík í Grindavík. Hann hét áður Óli á Stað GK-99. Báturinn var smíðaður hjá Seiglu á Akureyri 2014 og er útbúinn til línuveiða og er línan beitt um borð.
Í kaupunum fylgdu 1.163 tonna aflaheimildir í krókaaflakerfinu, mest þorskur, að sögn Kjartans Reynissonar, útgerðarstjóra Loðnuvinnslunnar. Loðnuvinnslan lét 200 tonna aflaheimildir í stóra kerfinu á móti þannig að kvóti Loðnuvinnslunnar eykst um tæplega þúsund tonn.