Engin ástæða er til annars en að vera bjartsýnn á meirihlutaviðræðurnar sem standa yfir á milli Sjálfstæðisflokks og Samfylkingar í Borgarbyggð. Góður taktur er í viðræðunum og ekki steytir á neinum atriðum. Þetta segir Björn Bjarki Þorsteinsson, oddviti sjálfstæðismanna, í samtali við mbl.is.
Segir hann að verið sé að fara í gegnum öll málefni á eðlilegum hraða og að mögulega megi gera ráð fyrir einhverjum fréttum á morgun. „Það er verið að ræða saman á góðum nótum,“ segir hann. Fulltrúar flokkanna munu hittast aftur á morgun seinni partinn og er Björn Bjarki bjartsýnn á framhaldið.
Meirihlutasamstarfið slitnaði vegna ágreinings um hagræðingu í skólamálum á Hvanneyri. Meirihlutinn hafði lagt fram tillögu um að grunn- og leikskóli Hvanneyrar yrði í sama húsnæði í Andabæ. Ágreiningur var uppi við íbúasamtök bæjarins um fjölda bekkjardeilda í skólanum.
Haft var eftir Birni Bjarka á mbl.is í síðustu viku að hann hefði orðið þess áskynja að fulltrúar Framsóknarflokksins væru byrjaðir að ræða við önnur framboð um meirihlutasamstarf án þess að hafa rætt málin við Sjálfstæðisflokkinn.