Viðar Þorkelsson, forstjóri Valitor, segir félagið áforma að árið 2017 verði 70% þjónustutekna félagsins vegna starfsemi í útlöndum.
Hlutfallið fór í 52% í fyrra og var það í fyrsta sinn sem erlenda veltan aflaði meira en helmings tekna, að því er fram kemur í umfjöllun um útrás Valitors í Morgunblaðinu í dag.
Samkvæmt ársreikningi 2014 námu rekstrartekjur um 8,6 milljörðum króna og voru þjónustutekjur þar af tæpir 8,2 milljarðar. Má því ætla að tekjur hafi verið á ellefta milljarð í fyrra. Valitor hefur stofnað eignarhaldsfélög í Danmörku og Bretlandi utan um starfsemi sína í þeim löndum.