Óvenju erfiðar aðstæður á spítalanum

Aðstæður á Landspítalanum eru óvenju erfiðar þessa dagana og hefur nýting legurýma verið yfir 100%. Útskriftir ganga hægar en viðunandi er. Þetta er meðal þess sem kemur fram í vikulegum pistli Páls Matthíassonar, forstjóra Landspítalans. 

Hann segir starfsfólk spítalans finna fyrir áhrifum inflúensufaraldusins af miklum þunga.

„Það er ekkert sem kemur okkur á óvart enda inflúensan og fleiri umgangspestir árviss gestur á þorra. Nú eru í gangi þrír stofnar inflúensunnar, tveir af stofni A og einn af stofni B.

Þó að við séum ýmsu vön þegar að þessum málum kemur þá eru aðstæður á spítalanum óvenju erfiðar eins og flestum er kunnugt um. Nýting legurýma hefur verið yfir 100% og útskriftir ganga hægar en viðunandi er.

Því er ástandið þungt bæði á bráðamóttöku og öðrum deildum og höfum við þegar gripið til aðgerða til að mæta því eftir þvi sem unnt er. Brýnt er að fólk leiti ekki á bráðamóttökuna nema nauðsyn beri til, auk þess sem mikilvægt er að aðstandendur með flensulík einkenni fresti heimsóknum. Við munum fylgjast náið með þróun mála,“ skrifar Páll. 

• Blogga um frétt