Alvarlegt umferðarslys varð á tíunda tímanum á hringveginum ofan við Vatnsleysu í Fnjóskadal. Tveir slösuðust í árekstri snjóruðningstækis og fólksbíls en hvorugur er í lífshættu.
Samkvæmt upplýsingum frá lögreglu og slökkviliðinu á Akureyri varð slysið klukkan 21:20 og fóru tveir lögreglubílar og tveir sjúkrabílar frá Akureyri auk slökkvibifreiðar með klippubúnað. Jafnframt var tækjabíll slökkviliði Þingeyjasveitar á Laugum í Reykjadal kallaður út.
Búið er að flytja annan manninn á Sjúkrahúsið á Akureyri og verið er að flytja hinn manninn þangað með sjúkrabifreið. Ekki er vitað hversu alvarleg meiðsl þeirra eru á þessari stundu en hvorugur er talinn vera með lífshættulega áverka.