Mikil ásókn í hótelrekstur

Nokkur hundruð hótelherbergi eru í undirbúningi í Stykkishólmi og á Sauðárkróki og nærsveitum. Eru þá lögð saman herbergi í byggingu og herbergi sem eru á teikniborðinu.

Talan er varlega áætluð og má nefna að fjölmargir hafa spurt um lóðir fyrir hótel í Stykkishólmi, að því er fram kemur í umfjöllun um mál þetta í Morgunblaðinu í dag.

Hringhótelin hyggjast fjölga herbergjum á Hótel Stykkishólmi í 179 og á Sauðárkróki undirbúa fjárfestar 60-80 herbergja hótel. Fram kom í Morgunblaðinu 13. febrúar að 3.300-3.500 hótelherbergi væru í undirbúningi. Þau hótel sem fjallað er um í samantekt blaðsins í dag voru þá ekki meðtalin. Með þeim eru minnst 3.700-3.900 herbergi í undirbúningi í alls 46 verkefnum.