Flutningaskip Rio Tinto í Straumsvík verður gert sjóklárt í fyrramálið með aðeins um einn tíunda hluta hefðbundins álfarms um borð.
Hafnarstarfsmenn byrja að gera skipið klárt klukkan 8 og leggur það úr höfn með farminn til Rotterdam í Hollandi.
„Það fer ekkert meira ál um boð. Áður en verkfallið skall á var búið að setja pínulítið um borð og síðan byrjaði hópur að setja ál um borð. Það var stoppað,“ segir Gylfi Ingvarsson, talsmaður starfsmanna í Straumsvík, og á þar við yfirmenn sem gengu í störf hafnarverkamanna.
Verkfallsverðir verða á svæðinu til að fylgjast með því að allt gangi vel fyrir sig. „Yfirmenn hörfuðu frá því að vinna frekar í útskipun af hálfu fyrirtækisins. Við eigum ekki von á frekari verkfallsbrotum af þeirra hálfu núna. En við verðum á verði til að fyrirbyggja að ekki verði gripið til annarra aðgerða. Ég á ekki von á því enda væri það mjög óskynsamlegt og það myndi flækja málin enn frekar,“ segir Gylfi.
Næsta flutningaskip kemur í höfn í Straumsvík næstkomandi mánudag og þá kemur ljós hvort hægt verður að fylla það af áli eða ekki. Allt fer það eftir því hvort verkfall hafnarverkamanna vegna útskipunar á áli verður enn við lýði.
Fundað var í dag hjá ríkissáttasemjara, án árangurs. Nýr fundur hefur ekki verið boðaður.