Framkvæmdastjórn Heimssýnar skorar á ríkisstjórn Íslands að fylgja fordæmi Sviss og afturkalla formlega umsókn sína um aðild að Evrópusambandinu. Þetta kemur fram í tilkynningu frá Heimssýn.
Segir þar að skiptar skoðanir hafi verið um hver sé stjórnsýsluleg staða umsóknar Íslands um aðild að Evrópusambandinu frá 2009. Utanríkisráðherra hafi lagt fyrir Alþingi 2014 tillögu til þingsályktunar um afturköllun umsóknarinnar að ESB.
„Tillögunni var ekki fylgt eftir á næsta þingi en í stað þess sendi utanríkisráðherra framkvæmdastjórninni bréf þar sem tilkynnt var að núverandi ríkisstjórn Íslands liti ekki á Ísland sem umsóknarríki. Og jafngilti það því að umsóknin hafi verið afturkölluð.“
Formleg staðfesting af hálfu ESB, um sama skilning á málinu, hafi hinsvegar ekki borist.
„Sendiherra ESB hér á landi hefur lýst því í viðtali að ESB líti svo á að umsóknin Íslands sé áfram virk. Staða umsóknar Sviss og Íslands hefur því verið í áþekk.“
Svissneska þingið samþykkti á þriðjudag, með 126 atkvæðum gegn 46, þingsályktunartillögu þess efnis að umsókn Sviss um inngöngu í Evrópusambandið, sem verið hefur á ís frá því að svissneskir kjósendur höfnuðu aðild að Evrópska efnahagssvæðinu (EES) í þjóðaratkvæðagreiðslu árið 1992, verði dregin til baka.
Viðræður höfðu þá hafist um inngöngu í sambandið en í kjölfar þjóðaratkvæðisins ákváðu svissnesk stjórnvöld að hætta þeim og setja umsóknina á ís þar sem hún hefur verið síðan.
Frétt mbl.is: ESB-umsókn Sviss verði dregin til baka
Segir í tilkynningunni að svissneska þingið líti svo á að mikilvægt sé að hafa hreinar línur í framtíðarsamskiptum við Evrópusambandið. Því sé mikilvægt að umsóknin sé formlega og ótvírætt dregin til baka.
„Sama má segja um stöðu umsóknar Íslands. Ýmsir stjórnmálaflokkar, samtök og einstaklingar líta opinberlega svo á að umsókn Íslands sé í fullu gildi og að hvenær sem er sé hægt að halda áfram ferlinu um inngöngu í Evrópusambandið.
Þess vegna er mikilvægt að á Íslandi eins og í Sviss séu hreinar línur í þessum efnum gangvart Evrópusambandinu. Því er í mikilvægt að ríkisstjórn og Alþingi fylgi fordæmi Sviss og samþykki formlega afturköllun umsóknarinnar að ESB frá 2009.“