Lögreglan á höfuðborgarsvæðinu hefur sent mál til rannsóknar hjá héraðssaksóknara þar sem lögreglumaður á frívakt handtók karlmann í Smáralind og beitti varnarúða. Var lögreglumaðurinn óeinkennisklæddur, en maðurinn sem var handtekinn var að sögn sjónarvotta í annarlegu ástandi. Í tilkynningu frá lögreglu kom fram að hann hafi verið að abbast upp á viðskiptavini í verslunarmiðstöðinni.
Kristján Ólafur Guðnason, starfandi yfirlögregluþjónn á almennri deild hjá embætti lögreglustjórans á höfuðborgarsvæðinu, segir að málið hafi verið um margt óvenjulegt. „Mál þetta, sem er um margt óvenjulegt með vísan til þess að lögreglumaður varð fyrir ofbeldisbroti utan vinnutíma og eins notkun á varnarbúnaði við sama tilvik, hefur verið sent héraðssaksóknara til skoðunar og þóknanlegrar meðferðar,“ segir Kristján. Tekur hann fram að lögreglan muni ekki tjá sig frekar um málið meðan beðið er niðurstöðu.
Frétt mbl.is: Var yfirbugaður með varnarúða
Segir hann að vegna atviksins hafi lögreglan á höfuðborgarsvæðinu til skoðunar hvort setja þurfi skýrari vinnureglur um vörslu valdbeitingartækja utan vinnutíma. Segir Kristján að stefnt sé að því að ljúka þeirri vinnu fljótlega.
Aðspurður um stöðu lögreglumannsins meðan á rannsókn stendur segir Kristján að hann hafi verið í veikindaleyfi eftir átökin við manninn. Segir hann að lögreglumaðurinn hafi þurft að leita sér aðhlynningar á spítala eftir þau. Staðfestir hann jafnframt að lögreglumaðurinn muni koma til starfa að leyfinu loknu.
Eins og mbl.is greindi frá á föstudaginn sögðu sjónarvottar sem rætt var við að maðurinn hafi komið inn í verslun Lyfju í Smáralind þar sem hann rakst, að því er virðist með vilja, í starfsmann. Lögreglumaðurinn kom síðan inn í verslunina í kjölfarið og fór að ræða við manninn. Þeir hafi farið að deila sem endaði með því að maðurinn sló til lögreglumannsins. Átök hafi þá brotist út sem enduðu með því að lögreglumaðurinn greip til varnarúðans, sem fyrr segir.
Loka þurfti versluninni um stund eftir atvikið, en skola þurfti úðann úr augum mannsins, þrífa verslunina auk þess sem öryggisverðir og lögregla kom á vettvang til að taka skýrslur af viðstöddum. Þá spurðu sjónvarvottar að því hvort það væri eðlilegt verklag að lögreglumaður á frívakt væri með varnarúða á sér.
Fram kemur í reglum um valdbeitingu lögreglumanna og meðferð og notkun valdbeitingartækja og vopna að lögreglu sé einungis heimilt að nota úðavopn þegar vægari aðferðir duga ekki til þess að yfirbuga mótþróa manns við handtöku. Ennfremur mega þeir einir nota úðavopn sem hlotið hafa slíka þjálfun.
Tekið er fram í reglunum að beiting úðavopns teljist vægari aðferð en beiting kylfu. Ávallt þurfi þó að hafa í huga að lögreglumenn verði að geta rökstutt beitingu úðavopna og ljóst þurfi að vera að önnur vægari úrræði hafi ekki dugað. Ekkert kemur fram í reglugerðinni um hvort lögreglumenn megi beita úðanum óeinkennisklæddir eða hvort lögreglumenn megi bera slíkt á frívakt.