Á morgun er spáð talsverðri rigningu á sunnan- og vestanverðu landinu samhliða hlýnandi veðri. Einnig mun rigna á norðvesturlandi. Hlýindi fylgja sunnanáttinni og mun hiti víðast hvar fara upp fyrir 5 stig og sums staðar ná 10 stigum.
Kemur þetta fram í viðvörun frá Veðurstofu Íslands.
Má því á morgun búast við asahláku um allt land sem ágerist þegar líður á kvöldið. Þetta verður fyrsta asahláka ársins og verður vatnsrennsli því mikið ofan af hálendi vegna úrkomu og leysingavatns.
Er t.a.m. hætta á að ár og vatnsföll vaxi mjög þannig að þau flæði yfir bakka sína og jafnvel varnargarða. Einnig er viðbúið að aukið álag verði á afrennsliskerfi bæja.
Við þessar aðstæður, sem reikna má með að myndist á morgun, er gott að hreinsa vel frá niðurföllum og útidyrum kjallara. En samfara hlákunni má búast við að blautur og þungur snjór finni sér farveg. Skapast því aukin hætta á aur- og krapaflóðum víðsvegar í fjalllendi.
Vegfarendur eru beðnir um að sýna sérstaka aðgát við og umhverfis ár sem og á ferðum sínum um fjalllendi.
Nánar má fylgjast með veðri á veðurvef mbl.is